Даяар Монгол Сонин

Их Британи, Умард Ирландын Вант улсын Онц бөгөөд бүрэн эрхт Элчин сайд Б.Алтангэрэл уламжлал болон зохиогдож буй энэ удаагийн чуулганы ажиллагааг нээж үг хэлэн өмнөх чуулганы талаар товч танилцуулга хийв. Улмаар чуулганд хүрэлцэн ирэгсдэд болон хамтран зохион байгуулж буй байгууллагууд, дэмжлэг үзүүлсэн иргэн, аж ахуйн нэгж, төрийн бус байгууллагуудад талархал илэрхийлж чуулганд амжилт хүсэв.

Тэрбээр хэлсэн үгэндээ гадаадад байгаа Монгол Улсын иргэдийн чуулга уулзалтыг цаашид илүү өргөн хүрээ хамарсан, далайцтайгаар зохион байгуулах бодолтой байгаагаа илэрхийллээ. Түүнчлэн Хилийн чанадад амьдарч буй Монгол Улсын иргэн, хуулийн этгээдийн эрх ашгийг хамгаалах, хамтран ажиллах Зөвлөл Монгол орноос анх удаа чуулганд цахим хэлбэрээр, шууд холбогдон оролцож буйг ихээр сайшааж, цаашид тус Зөвлөлөөс биечлэн оролцож, гадаадад амьдарч буй иргэдийнхээ тулгамдаж буй асуудал, санаа бодлыг сонсож, дүн шинжилгээ хийж, улс орны хөгжилд оруулж буй энэхүү оюуны хөрөнгө оруулалтыг нэгдсэн зохион байгуулалтанд оруулах, туслалцаа дэмжлэг үзүүлэх талаар Засгийн газраас олон арга хэмжээ авна гэдэгт найдаж буйгаа хэлэв.

Чуулга уулзалтанд Хилийн чанадад амьдарч буй Монгол Улсын иргэн, хуулийн этгээдийн эрх ашгийг хамгаалах, хамтран ажиллах Зөвлөлийн ажлын албаны дарга Ч.Энх-Эрдэнэ цахим хэлбэрээр мэндчилгээ дэвшүүлж Засгийн газраас гадаадад байгаа иргэдийнхээ талаар авч хэрэгжүүлж буй үйл ажиллагааныхаа талаар танилцуулж, улс орныхоо хөгжилд санаа тавьж, өөрсдийн хувь нэмрийг оруулахаар хуран чуулж буйд талархал илэрхийллээ. Энэхүү чуулга уулзалт нь улс хооронд анх удаа онлайн хэлбэрээр зохион байгуулагдснаараа онцлог болсон бөгөөд Нутгийн удирдлагын танхимаас шууд холбогдож ажлын албан ажилтнууд бүрэлдэхүүнээрээ оролцон санал бодлоо солилцов.

Жил бүр уламжлал болон 6 дахь удаагаа зохиогдож буй энэ удаагийн чуулганд хамгийн олон буюу нийт 23 илтгэлүүд хэлэлцэгдэж Герман, Голланд, Ирланд, Монгол, Польш, Финланд, Франц, Швед зэрэг орнуудаас цахим хэлбэрээр болон биеэр ирж оролцсон ба илтгэгч нарын 11 нь докторын зэрэгтэй, 7 нь докторын зэрэг хамгаалахаар суралцаж байна.

Энэхүү чуулганы зохион байгуулах багийн ахлагч Британий монголчуудын холбооны тэргүүн Д.Цэрэнбат Британий монголчуудын чуулга уулзалтын агуулга, ач холбогдол, цаашдын чиглэл, зорилгын талаар танилцуулав. Гадаадын өндөр хөгжилтэй улс орнуудад тухайн салбартаа эрдмийн зэрэг цол хүртсэн мэрэгжлийн судлаачид, эрдмийн зэрэг хамгаалж буй, нарийн мэргэжлийн чиглэлээр ажиллаж, нэр хүндтэйгээр сурч байгаа иргэд анагаах ухаан, түүх, соёл, хэл, зан заншил, математик загварчлал, байгалийн ухаан зэрэг сэдвүүдээр маш сонирхолтой илтгэлүүд тавьлаа.

Өнгөрсөн удаагийн чуулга уулзалтуудад тавигдсан илтгэлүүдийн товхимол жил бүр хэвлэгдэн гарч байсан ба энэ удаагийнх мөн адил хэвлэгдэж төр засгийн удирдлагуудад хүргүүлж, олон нийтэд хүрэх юм байна.